
БНХАУ-ын дарга Ши Жиньпин ОХУ-ын Ерөнхийлөгч Владимир Путинтэй өнөөдөр Хятадын өмнөд хэсгийн Шэньжэнь хотод уулзлаа. Энэхүү уулзалт АНУ-ын Ерөнхийлөгч Дональд Трамп Хятадад айлчлахын өмнөхөн болж буйгаараа олон улсын анхаарлыг татаж байна. Хоёр улсын төрийн тэргүүн Ази, Номхон далайн эдийн засгийн хамтын ажиллагааны байгууллага (APEC)-ын дээд хэмжээний уулзалтын үеэр хоёр талын хэлэлцээ хийсэн бөгөөд энэ онд тав дахь удаагаа уулзаж байгаа нь энэ юм. Тэд өмнө нь дөрвөн удаа биечлэн болон цахимаар харилцсан байна.
Уулзалтын үеэр Ши Жиньпин Хятад, Оросын харилцаа олон улсын нөхцөл байдал өөрчлөгдөж байгаа ч тогтвортой хөгжиж байгааг онцолжээ. Мөн хоёр улс дэлхийн олон туйлт тогтолцоог хөгжүүлэх, олон улсын харилцаанд хамтын ажиллагааг бэхжүүлэхэд хувь нэмрээ оруулах ёстой гэж үзсэн байна.
Харин Владимир Путин барууны орнуудын ОХУ-д тавьсан эдийн засгийн хориг арга хэмжээ зорилгодоо хүрээгүй хэмээн мэдэгдэж, улс орнуудын хоорондын зөрчлийг ультиматум бус яриа хэлэлцээгээр шийдвэрлэх шаардлагатайг онцолсон байна. Тэрээр мөн дэлхийн улс төр, цэргийн эрсдэл нэмэгдэж буй энэ үед эв нэгдэл, түншлэл чухал гэдгийг тэмдэглэжээ.
Энэхүү уулзалтын дараа арваннэгдүгээр сарын 19-нд Ши Жиньпин, Владимир Путин, Дональд Трамп нар гурван талт дээд хэмжээний уулзалт хийхээр төлөвлөж байна. Энэ нь дэлхийн гурван том гүрний удирдагч нэг дор уулзах түүхэн үйл явдал болох юм.
Уулзалтаар Украины дайн, Ираны асуудал, цөмийн зэвсгийн хяналт, худалдаа, хиймэл оюун ухаан зэрэг олон улсын анхаарлын төвд байгаа асуудлыг хэлэлцэх төлөвтэй байна. Гэхдээ хэлэлцэх асуудлын хүрээ, тодорхой үр дүн одоогоор бүрэн тодорхой болоогүй байна.
Гурван улсын удирдагчдын уулзалтыг зарим ажиглагч 1945 оны Ялтын бага хуралтай харьцуулж байгаа бөгөөд дэлхийн томоохон гүрнүүд жижиг улс орнуудын эрх ашгийг үл харгалзан геополитикийн тохиролцоо хийх вий гэсэн болгоомжлол ч бий. Ийнхүү Ши Жиньпин, Путин нарын уулзалт АНУ, Хятад, Оросын харилцааны цаашдын чиг хандлагыг тодорхойлох чухал дипломат үйл явдлын өмнө болж байна.
Л.Баяр






















































