УИХ-ын чуулганы хуралдааны үеэр УИХ-ын гишүүн Ц.Мөнхтуяа, Боловсролын сайд П.Наранбаярыг багш нарын цалингийн асуудлаар "зугтаад байлгүй, ярилц" гэж байв. Харин сайд "зугтаагүй" гэдгээ тайлбарлаж байлаа. Тэгвэл Боловсролын сайд П.Наранбаяр зөвлөх Д.Гантулга, Боловсролын яамны Боловсролын нэгдсэн бодлого, төлөвлөлтийн газрын дарга П.Оюунаа нарын хамт УИХ-ын гишүүн Ц.Мөнхтуяа, Монголын багш нарын үйлдвэрчний эвлэлийн холбооны ерөнхийлөгч Д.Мөнхбаатар нарыг хүлээн авч уулзсан байна.

Уулзалтын үеэр сургалтын хөтөлбөрийн шинэчлэл, багш нарын цалинг нэмэгдүүлэх, гүйцэтгэлийн үнэлгээний урамшууллын тогтолцоо, тэтгэвэр тэтгэмжийн талаар санал солилцов. Мөн ерөнхий боловсролын сургуулийн захирал, удирдах ажилтнуудыг шилжүүлэн ажиллуулах нь зүйтэй гэдэгт санал нэгдэж, уулзалтаар ярилцсан дээрх чиглэлүүдэд хамтран ажиллахаар болжээ.