NBA драфтын шилдэг 100 тоглогчийн нэг, "Mongolian Mike" хочит Шаравжамцын Энхийн-Од зургадугаар сарын 8-ны өдөр Сан Франциско хотын "University of San Francisco" их сургуультай танилцах уулзалт хийжээ.
Энэ үеэрээ Сан Франциско хот дахь Ерөнхий консулын газарт USF сагсанбөмбөгийн багийн ерөнхий дасгалжуулагч Крис Герлуфсен болон дасгалжуулагчдын баг бүрэн бүрэлдэхүүнээрээ, Rize Management агентлагийн үүсгэн байгуулагч Скотт Николс, USF сургуулийн Бизнесийн их сургуулийн декан Э.Отгонцэцэг нарын хамт зочилжээ. ЕКГ-ын зүгээс зочдоо монгол хоолоор дайлж, Ш.Энхийн-Одод сурлага, спортын өндөр амжилт хүсэн Сан Францискогийн их сургуулийн шигшээ багт тогловол тус ЕКГ болон Бэй Аэриа дахь монголчууд уухайлан дэмжихээ илэрхийлсэн байна.
АНУ-ын коллежийн сагсанбөмбөгийн лиг NCAA-ийн Dayton Flyers багт тоглож байсан тэрбээр Сан Францискогийн их сургуулийг сонголоо. Ийнхүү Ш.Энхийн-Од хэмээх монгол хүү USF сагсанбөмбөгийн багийн гарааны холбогчоор тоглох юм.
