"Шүүдэр" продакшны уран бүтээлчид Юань гүрний үед амьдарч байсан Хотол Цагаан Сарангэрэлт гүнжийн тухай “Хотлун гүнж” тулаант, адалт явдалт кино бүтээж байна. 2015 оноос бэлтгэл ажлаа  эхэлсэн эл бүтээлийн гол дүр бөх гүнж хэмээн алдаршсан Хотлун гүнжийн дүрд жүжигчин, мисс А.Баярцэцэг сонгогджээ. Холливудад жүжигчин мэргэжлээр суралцан, “Марко Поло” цуврал болон хэд хэдэн кинонд тоглоод буй тэрээр тулааны урлагаар хичээллэдэг, англи, испани хэлтэй, “Ертөнцийн мисс-2016” тэмцээнд Монгол Улсаа төлөөлөн оролцож шилдэг 16-д багтсан билээ. Эл бүтээлд Хубилай хаантай эцсээ хүртэл тэмцсэн Өгөдэй хааны ач хүү Хайду хааны охин, энгүй хүчит, эрэлхэг зоригт Хотол цагаан Ажуруг буюу Сарны гэрэл гүнжийн тухай өгүүлэх юм.

Киноны зохиолыг зохиолч Б.Шүүдэрцэцэг, Д.Болдхуяг нар хамтран бичсэн бол Хотлун гүнжийн сэтгэлт залуу Абатай баатрын дүрд жүжигчин Б.Анхбаяр, Хайду хаанд МУГЖ Б.Жаргалсайхан нар тоглоно.

Эл бүтээл 2017 оны хавар нээлтээ хийж, үзэгчдийн хүртээл болох аж.