Улсдаа томоохонд тооцогддог "Багануур", "Шивээ-Овоо" компаниуд өнгөрсөн онд алдагдалтай ажиллажээ.

Тодруулбал 2013 онд “Багануур” 9.1 тэрбум төгрөг, "Шивээ-Овоо" 3.2 тэрбум төгрөгийн алдагдал хүлээсэн байна.

Монголын хамгийн том хүрэн нүүрсний орд Шивээ-Овоогийн бүтээгдэхүүний борлуулалт өнгөрсөн онд 86.3 тэрбум төгрөгт хүрсэн ч хөрс хуулалт, нүүрсний олборлолт, тээвэрлэлт зэргээс үүдэлтэй зарлага нь орлогоо 1.4 тэрбум төгрөгөөр давжээ.

Мөн үйл ажиллагаатай холбоотой ерөнхий болон удирдлагын зардал нэмэгдсэнээр компанийн цэвэр алдагдал гурван тэрбум 260 сая төгрөгт хүрсэн байна. Компанийн санхүүгийн ерөнхий байдлыг харвал нийт 93.1 тэрбум төгрөгийн хөрөнгөтэй байгаагаас 26.8 тэрбумыг нь бараа материал, мөнгө, түүнтэй адилтгах хөрөнгө зэрэг эргэлтийн хөрөнгө бүрдүүлжээ. Түүнчлэн компанийн дансанд 80.5 тэрбум төгрөгийн өр, төлбөр бичигдсэн нь анхаарал татаж байна. 90 хувь нь төрийн мэдэлд буй Шивээ-Овоогийн уурхайн хувьд одоогоор Улаанбаатарын цахилгаан станцуудад нийлүүлэхээр жилд 0.5-1 сая тонн нүүрс олборлож байна.