Монгол Улсын Ерөнхий сайд, МАН-ын дарга Л.Оюун-Эрдэнэ үг хэллээ.

Тэрбээр "Эрхэм хүндэт Монгол Улсын иргэд, эрхэм сонгогчид та бүхэндээ парламентыг бүрдүүлэх ес дэх удаагийн сонгуульд маш идэвхтэй оролцож, саналаа өгч, эрхээ эдэлсэнд чин сэтгэлийн талархал илэрхийлье.

Бид Үндсэн хуулийн нэмэлт өөрчлөлтөөр шинэ 30 жилийг эхлүүлэх тухай улс төрийн намууд зөвшилцөж, энэхүү тогтолцооны өөрчлөлтийг хийж чадсан. Парламент бол ард түмнээс хол харагддаг, парламентад хоёр намаас өөр нам орж ирж чаддаггүй, нийгмийн салбарын төлөөлөл, хөгжлийн бэрхшээлтэй иргэдийн төлөөлөл орж ирж чаддаггүй, ажилтан, ажил олгогчдын төлөөлөл ч орж ирж чадахгүй 34 жил болсон байна.

Өнөөдөр бид анх удаа 126 төлөөлөл бүхий шинэ парламентыг бүрдүүлж, салбар салбарын, нийгмийн дуу хоолойны төлөөлөл болсон ард түмний парламент бий болж байна. 34 жилийн түүхэнд анх удаа 5-6 парламентын намтай болж байна. Энэ бол ардчиллын мэтгэлцээнд шинэ түүхийг нээж байгаа хэрэг. Мөн Үндсэн хуулийн өөрчлөлтийг бий болгоход тусалсан парламентын гишүүддээ баярлалаа. Мөн АН болон ХҮН намын удирдлагуудад энэ шинэчлэлтийг хийхэд оролцсонд талархал илэрхийлье.

Манай нам урьдчилсан байдлаар 68-70 суудалтай болохоор тооцоолол ирж, ялалт байгуулж байна. Энэ бол МАН-ын ялалт гэхээс илүү ард түмний ялалт. Цоо шинэ 30 жилийн эхлэл, үзэл санааны рецорм болж байгаагаараа Монгол Улсын парламентад шинэ хуудас болж үлдэнэ. Шинэ 30 жилийнхээ тогтолцоонд бид бас дасах ёстой.

Парламентын намууд илүү бодлогынх болно. Намуудын дэргэд бодлогын судалгааны хүрээлэнгүүд бий болно. Үзэл баримтлалаараа мэтгэлцэнэ. Ард түмний санал гээгдэхгүй, толины тусгал мэт харагдана. Санал өгөх үедээ сэтгэл хангалуун байсан зүйл бол ардчилсан хувьсгал анхдагч үнэт зүйл дээрээ эргэн ирэх ард түмний дуу хоолойны ялалт болж байна. 

Биднийг дэмжсэн бүх хүмүүстээ талархал илэрхийлье. Үзэл баримтлалын хувьд өрсөлдсөн намууд болон бидэнд саналаа өгөөгүй сонгогчдодоо ч бас баярлалаа" гэв.