Индонезийн нийслэл Жакартагаас Пангкал Пинанг хот уруу нислэг үйлдэж байсан “Lion Air” компанийн “Boeing 737 MAX 8” зорчигч тээврийн онгоц хөөрөөд удалгүй нислэгийн хяналтын төвөөс холбоо тасраад байсан юм. 181 зорчигчтой хөөрсөн JT-610 нислэгийг үйлдэж байсан уг онгоц далай дээгүүр нисэж байхдаа холбоо тасарсан байна. Зорчигчдоос гадна нислэгийн багийн зургаан гишүүн байжээ. Удалгүй Индонезийн Эрэл хайгуул эрсдэлийн агентлагаас онгоц Индонезийн Жава арал дээр орших далайд осолдсон тухай мэдээлжээ. Ослын шалтгааныг одоогоор тогтоогоогүй байгаа ба 130 хүний бүрэлдэхүүнтэй аврах баг ажиллаж байна.

“Boeing 737 MAX 8” онгоц өнөөдөр /2018.10.29/ өглөө орон нутгийн цагаар 06.20 минутад Жакартагаас хөөрч, цагийн дараа Пангкал Пинанг хотод газардах ёстой байжээ. 2016 оноос үйлчилгээнд нэвтэрсэн “Boeing 737 MAX 8” онгоц 210 хүний даацтай.  Нислэгийн зөвлөх Гэрри Сойхатман осолдсон онгоцонд туршилтын нислэгийн үеэр бага зэрэг асуудал үүсэж байсан тухай BBC-д өгсөн ярилцлагадаа дурджээ.

“Lion Air” компани нь 1999 онд байгуулагдсан Индонезийн нислэгийн хамгийн хямд бөгөөд том компани. Тус компани нь Зүүн өмнөд Ази, Австрали, Дундад Ази руу цөөн тооны нислэг үйлддэг ба ихэвчлэн дотоодын жижиг нислэгүүд үйлддэг юм байна. Аюулгүй байдал болон менежмент муу гэх шалтгаанаар 2016 оноос хойш Европ руу нислэг үйлдэх эрхгүй болсон байна.

Эх сурвалж: BBC