Taйландын Бангкок хотноо болж байгаа шайбтай хоккейн “Челленж кап” олон улсын тэмцээнд манай баг тамирчид гурав дахь хожлоо байгуулж, мөнгөн медалийн болзол хангажээ.

Манай шигшээ баг эхний тоглолтоо энэ сарын 17-нд Сингапурын багтай хийж 13:0 гэсэн оноогоор илэрхий ялсан бөгөөд хоёр дахь тоглолтоо /2017.03.21/ Тайландын багтай хийж гурван үеийн турш эн тэнцүү өрсөлдөж 5:4 гэсэн оноогоор хожсон.

Ингэснээр эхний хоёр өрсөлдөгчөө  хожсон манай баг АНЭУ-ын дараа хоёрдугаарт бичигдсэн бол  тэргүүлэгч баг Малайзыг 10:3, Сингапурыг 10:0-ээр тус тус хожиж манай багийн өмнө бичигдсэн. Харин манай баг тамирчид гурав дахь тоглолтоо Малайзын багтай хийж, 10:5 гэсэн оноогоор хожсон амжилтаар манай хоккейчид мөнгөн медалийн болзол хангажээ.

Маргааш буюу энэ сарын 23-нд АНЭУ-ын багтай аваргын төлөө тоглоно. Манай шигшээ баг АНЭУ-ын багийг хожвол  энэ тэмцээнд анх удаа тэргүүлнэ. Энэ тэмцээнд түрүүлсэн баг Ази тивийн АШТ оролцож, БНСУ, Япон зэрэг орны шилдэг багуудтай тоглох эрхтэй болно.