Сингапурын Чанги олон улсын нисэх онгоцны буудал тав дахь жилээ дараалан дэлхийн шилдэг онгоцны буудлаар тодорчээ. Энэ шагналыг нисэх онгоцны буудлаар үйлчлүүлэгч сая сая иргэдийн дунд явуулсан судалгааны үр дүнгээр шалгаруулдаг аж. Тав дахь жилээ тэргүүлж буй Чанги нисэх онгоцны буудалд 24 цагийн турш сүүлийн үеийн кинонуудыг үнэгүй үзүүлэх кинотеатр, дээвэр дээрх усан сан, бүх төрлийн эрвээхэйнүүдийг үзэж сонирхох цэцэрлэгт хүрээлэн гэх мэт үзвэр үйлчилгээ байдгаас гадна гурван терминал нь зорчигчдын ая тухтай байдлыг дээд зэргээр хангаж чаддаг байна. Түүнчлэн энэ оны хоёрдугаар хагаст тус нисэх онгоцны буудал дөрөв дэх терминалаа нээх аж.