Оны эхний 7 сарын байдлаар гадаад худалдааны тэнцэл 604 сая ам.долларын ашигтай гарсан талаар Үндэсний статикийн хороо мэдээлсэн. 

Хэдийгээр эрдэс бүтээгдэхүүний ханшийн уналтын улмаас экспортын орлого 4.3 хувиар буурсан ч, импорт илүү эрчимтэй буюу 915.7 сая ам.доллараар хумигдсан байна.

Экспортоос эрдэс бүтээгдэхүүний экспортыг задлаад харвал, алтны биет экспорт өнгөрсөн оны мөн үеэс 46 хувиар нэмэгдэж, 4.6 тонн болоод байгаа.

Орлогын хувьд 36 хувиар өсч, 180 орчим сая ам.доллар болжээ. Мөн экспортын орлогын 60 хувийг бүрдүүлж байгаа зэсийн баяжмалын экспортын хэмжээ болон орлого тус бүр 10 гаруй хувиар нэмэгдсэн байна.

Тухайлбал, “Оюу Толгой” болон “Эрдэнэт” үйлдвэр хамтран нийт 1.35 тэрбум ам.долларын үнэ бүхий 784 мянган тонн зэсийн баяжмал экспортолжээ. Цайрын хүдэр, баяжмалын экспортын орлого 40 гаруй хувиар нэмэгдэж 81 сая ам.доллар болсноор, экспортод жин дарж байгаа эрдэс бүтээгдэхүүнүүдээс орлого нь биет хэмжээгээ давж өссөн ганц бүтээгдэхүүн болж байна.Харин нүүрс, газрын тосны хувьд зах зээлийн байдал таагүй хэвээр байгаа.

Үүнтэй холбоотойгоор 2 бүтээгдэхүүний экспортын орлого 30-аас 40 орчим хувиар буурч, нийлбэр дүнгээр 588 сая ам.доллар болсон байна.