Сингапур улсад зохион байгуулагдаж буй ФИБА 3х3 Азийн аварга шалгаруулах тэмцээний В хэсэгт багтсан Монгол улсын эрэгтэй шигшээ баг эхний хожлоо Гри Ланка улсын эсрэг хийж хожлоо. Энэ хэсэгт Тайланд, Шри Ланка улсууд бий. Манай шигшээ багийн хувьд энэ өдөр хоёр тоглолт хийнэ.

Тоглолтын цаг дуусах мөчид манай шигшээ баг 15:13-аар илүүрхсэн юм. Тэд хэсгийн хоёр дахь буюу сүүлийн тоглолтоо Тайландын эсрэг өнөөдөр орой хийнэ. Шри Ланкын эсрэг А.Азбаяр 5 оноо, 11 самбараас бөмбөг авалт хийж багаа тэргүүлэв. 

Харин эмэгтэй шигшээ багийн хувьд С хэсэгт Малайз, Филлипиний багуудтай багтжээ. Тэд мөн л энэ өдөр хоёр тоглолт хийх бөгөөд эхний өрсөлдөгч нь Малайзын шигшээ баг байх болно.  

Эрэгтэй шигшээ багийн бүрэлдэхүүнд А.Ананд, А.Азбаяр, С.Биндэрьяа, Ч.Тэмүүлэн нар багтжээ. Харин эмэгтэй шигшээ багийн бүрэлдэхүүнд О.Хулан, Ө.Индра, Б.Ариунцэцэг, М.Цэрэнлхам бий.

Л.Сайнаа