ОХУ-ын Ерөнхийлөгч Владимир Путин 18-30 насны 160 мянган эрэгтэйг цэргийн албанд татсан нь 2011 оноос хойших хугацаанд ОХУ-д цэргийн албанд татагдсан цэргийн албан хаагчдын тоо хамгийн өндөрт хүрсэн үзүүлэлт болж байна. Орос цэргийнхээ нийт тоог 2.39 саяд, жинхэнэ албан хаагчдын тоог 1.5 саяд хүргэх ёстой гэж Путин хэлсэн удаатай.

Энэ нь ирэх гурван жилийн хугацаанд цэргийн тоогоо 180 мянгаар нэмнэ гэсэн үг юм. ОХУ-ын Дэд адмирал Владимир Цимлянский хэлэхдээ, шинэ цэрэг татлагыг Оросын "тусгай цэргийн ажиллагаа"-ны хүрээнд Украинд илгээхгүй гэв.

Мягмар гарагт болсон хүчирхийлэл намжаагүй бөгөөд өмнөд хэсгийн Херсон хотын эрчим хүчний байгууламж руу Оросууд халдсаны улмаас 45 мянган хүн гэрэл цахилгаангүй болсон гэж Украин мэдэгдэв.

Хэдийгээр АНУ-ын зуучлалаар Украинтай байгуулсан гал зогсоох хэлэлцээрээс Орос татгалзсан ч Украины эрчим хүчний байгууламжид халдлага үйлдэхээ зогсоохыг зөвшөөрсөн юм. Гэвч тэд Украины дэд бүтцэд халдсанаа үгүйсгэсэн хэвээр байна. 

Орос улс хавар, намрын улиралд хугацаат цэргийн албан хаагчдыг цэргийн албанд татдаг. Путины төлөвлөгөөний дагуу тус улс эн жил 2024 оны мөн үеээс 10 мянгаар илүү эрчүүдийг цэргийн албанд татах аж. Тус улсад өнгөрсөн оны эхэнд цэрэгт татагдах залуучуудын насны дээд хязгаарыг 30 болгон нэмэгдүүлсэн.

Л.Баяр