Монгол Улсын Үндэсний шигшээ баг, Зэвсэгт хүчний 327 дугаар ангийн алба хаагч, ОУХМ, дэслэгч Баярцогтын Мөнхзаяа БНХАУ-ын Шанхай хотноо зохион байгуулагдсан олон улсын уралдаанд шулуун замын 10 километрийн зайд 33.31 цагийн амжилтаар дөрөвдүгээр байрт шалгарч, Монгол Улсын рекордыг анхлан тогтоожээ.

Ердөө нэгхэн сарын өмнө тэрбээр БНХАУ-ын Хөх хотод болсон олон улсын марафон гүйлтийн тэмцээнд тэргүүлсэн юм. 

ОУХМ Б.Мөнхзаяа “Этиоп, Марокко зэрэг марафон гүйлтээр тэргүүлэгч 10 гаруй орны шилдэг 100 гаруй тамирчинтай өрсөлдөж, тусгай байрт шалгарлаа. Шулуун замын 10 километрийн зайдаа Монгол Улсын эмэгтэй тамирчдаас анхлан оролцсон учраас рекорд амжилт тогтоолоо. Монгол Улсаас ганцаараа оролцсон, одоо эх орон руугаа буцаж байна. Намайг бүх талаар дэмждэг Монгол Улсын Үндэсний шигшээ баг, Зэвсэгт хүчний Жанжин штаб, Зэвсэгт хүчний 327 дугаар анги, “Алдар” спорт хороо, дэмжигч компани, аж ахуй нэгжийн удирдлага хамт олонд баярлалаа” гэж сэтгэгдлээ хуваалцсан байна.

Одоо түүний өмнө ирэх 12 дугаар сард БНХАУ-ын Шанхай хотноо зохион байгуулагдах марафоны гол тэмцээн нь хүлээж байна. 

Л.Баяр