Нью Мексикогийн тусгай прокурорууд 2021 онд жүжигчин Алек Болдуины “Rust” киноны зураг авалтын үеэр хийсэн үйлдэл нь зураглаач Халина Хатчинсыг буудан хөнөөсөн хэргийн эцсийн цэгийг хатгав бололтой. 

Гуравдугаар сард Болдуины баг жүжигчний эсрэг яллах дүгнэлтийг хэрэгсэхгүй болгох хүсэлт гаргасны дараа прокурорууд баасан гарагт мэдүүлгээ өгөхийг хүсчээ. Прокурорууд Болдуины хийсэн үйлдлийн талаарх өмнөх ойлголтуудыг үгүй хийсэн. Тэд зураг авалтын үеэр түүнийг сэтгэл хөдлөлөө огт хянаж чадаагүй гэжээ. 

Баримт бичигт дурдсанаар, Болдуин зураг авалтын эхний өдрүүдэд багийнхан болон хуяг дуулгачин Ханна Гутиеррез Ридээс илүү хурдан ажиллахыг шаарддаг байсан. Тэр киноны зураг авалтын багийнхныг яаруулж байсан нь аюулгүй байдлыг алдагдуулсан гэжээ. Түүнчлэн Болдуин багийн гишүүдийг болон өөртөө байнга хашгирч, харааж зүхдэг байсан бөгөөд "түүний зан байдал" эргэн тойрныхоо хүмүүст хэрхэн нөлөөлсөн талаар огт санаа зовдоггүй байжээ. Энэхүү үйлдэл нь зураг авалтын үеэр аюулгүй байдлыг алдагдуулахад нөлөөлсөн гэдгийг гэрчүүд нотолсон байна. 

Нэгдүгээр сард Болдуин санамсаргүй аллага үйлдсэн хэрэгт буруугүй гэж мэдэгдээд байв. Тухайн үед Болдуин барьж байсан буунаасаа сум алдаж, зураглаач Хатчинс нас барж, найруулагч Жоэл Соуза шархадсан.

Киноны зураг авалтын талбай дээр галт зэвсгийн аюулгүй байдал, хадгалалтыг хариуцаж байсан Гутиеррез Рид гуравдугаар сард санамсаргүйгээр хүн амины хэрэг үйлдсэн гэм буруутай нь тогтоогдсон. Түүнд 18 сар хорих ял, 5000 долларын торгууль ногдуулсан юм. Гэвч одоо эл хэргийн гэм буруу жүжигчин рүү эргэв бололтой. 

Л.Сайнаа