Өнөө шөнө Улаанбаатарын цагаар 23:14 цагт сар хиртэж эхэлнэ.  Оргил үе нь 5 дугаар сарын 6-ны  01:22 цагт болж, үүрийн 03:31 цагт дуусах ажээ. Сар хиртэх хугацаа нийт 4 цаг 18 минут үргэлжлэх юм. Ийнхүү Улаанбаатар Одон орон судлах оргилын байршлаар сарны хиртэлтийн хугацааг тооцон гаргажээ.

Сар хиртэлт гэдэг нь Сар Дэлхийн сүүдэрт орох үзэгдэл юм. Энэ нь Нар, Дэлхий, Сар гурав энэ дарааллаараа нэг шугаманд давхцах, эсвэл бараг нэг шугаманд орох үед ажиглагддаг.

Сар хиртэлт нь зөвхөн тэргэл сартай үдэш л болдог бөгөөд өнөөдөр хаврын адаг сарын шинийн 15 тохиож буй. Сар хиртэх үйл явцыг дэлхийн хаанаас ч харах боломжтой.

Сарны хэмжээ жижиг байдгаас нарны бүтэн хиртэлт хэдхэн минут үргэлжилдэг бол сарны хиртэлт нь хэдэн цагаар үргэлжилнэ. Мөн сар хиртэлтийн үеэр тусгай багаж ашиглалгүй харахад аюулгүй байдгаараа нар хиртэлтээс ялгаатай аж.