БНСУ-ын Ерөнхийлөгчийн сонгууль өчигдөр болж, “Тобуро” намаас нэр дэвшигч Мүн Жэ Ин ялалт байгуулав. Тэрбээр сонгогсдын 41.4 хувийн саналыг авсан бол “Солонгосын эрх чөлөөний нам”-аас нэр дэвшигч Хон Жүн Пё 23.3 хувь, “Ардын нам”-аас нэр дэвшигч Ан Чоль Сү 12.8 хувийн санал авчээ. БНСУ-ын 19 дахь Ерөнхийлөгчөөр сонгогдсон Мүн Жэ Инийн талаарх 24 баримтыг хүргэж байна.
Баримт 1. Мүн Жэ Ин 1953 оны арванхоёрдугаар сарын 22-нд Өмнөд Солонгос улсын Коджедо аралд таван хүүхэдтэй айлын ууган хүү болон мэндэлжээ.
Баримт 2. Тэрбээр эхнэр, хоёр хүүхэдтэй. Ромын католик шашинтай нэгэн аж.
Баримт 3. Түүний аавыг Мүн Ён Хюн, харин ээжийг нь Кан Хан Ок гэдэг.
Баримт 4. Тэд 1950 онд Солонгосын хойг дайны хөлд нэрвэгдэх үед БНАСАУ-ын Өмнөд Хамгён аймгаас АНУ- ын “MEREDITH VICTORY” гэх ачааны хөлөг онгоцонд сууж, Коджедо арал руу дүрвэн ирсэн цагаачдын нэг байсан гэдэг.
Баримт 5. Тэдний гэр бүл Коджедод суурьшиж, Мүн Жэ Инийн аав “Geoje POW Camp” үйлдвэрт ажиллах болсон байна.
Баримт 6. Мүн Ён Хюнынх Өмнөд Солонгост дүрвэн ирж суурьшаад, гурав дахь өвөлтэйгөө золгохдоо анхны үрээ өлгийдөн авсан нь БНСУ-ын Ерөнхийлөгчөөр сонгогдсон Мүн Жэ Ин байсан аж.
Баримт 7. Мүн Жэ Ин анх Бусан хотын “Кюннам” ахлам сургуульд элсэн орж байжээ. Тэрбээр сарын төлбөрөө төлөөгүй гэх шалтгаанаар хичээлийн танхимаасаа хөөгдөж байсан удаатай нэгэн.
Баримт 8. Мүн Жэ Инийн аавынх туйлын ядуу зүдүү амьдралтай байсан гэдэг. “Хангёл” сонинд бичсэнээр, эрдэнэ шишийн үрийг үдийн хоолондоо зооглодог байсан бөгөөд түүгээрээ бүтэн өдрөө даадаг байсан гэнэ.
Баримт 9. Мүн Жэ Ин ахлах сургуулиа төгссөний дараа “Кюнхэ” их сургуульд хуулийн чиглэлээр дэвшин суралцжээ.
Баримт 10. 1975 онд Мүн Жэ Ин Ерөнхийлөгчийн засаглалын эсрэг Ардчилсан хөдөлгөөнд оролцсон гэх шалтгаанаар баривчлагдан хоригдож байжээ.
Баримт 11. Тухайн үед БНСУ-ын Ерөнхийлөгчөөр эдүгээ хэд хэдэн хэрэгт буруутгагдан хоригдож буй экс Ерөнхийлөгч Пак Гын Хегийн эцэг Пак Чун Хе ажилладаг байсан байна.
Баримт 12. Пак Чун Хег дарангуйлагч байсан гэж тодорхойлох нэгэн байдаг ч, БНСУ-ын өнөөгийн хөгжлийн эхлэлийг тавьсан гэж үнэлэх хүмүүс олон байдаг юм. Харин тухайн үед түүний дэглэмийг эсэргүүцсэн Ардчиллын төлөөх хөдөлгөөний дараа Мүн Жэ Ин баривчлагдан, Сөүлийн шоронд хоригдох болжээ.
Баримт 13. Харин түүний буруутгагдсан үндэслэл нь ч их сургуулиасаа хөөгдөхөд хүргэж, улмаар хүчээр шахам цэрэгт явсан гэдэг.
Баримт 14. Мүн Жэ Ин цэрэгт байхдаа тусгай хүчинд багтаж чадсан байна. Улмаар 1976 онд Панмунжон тосгонд Хойд Солонгосын арми Өмнөд Солонгос буюу НҮБ- ын цэргүүдтэй мөргөлдөөн үүсгэхэд тэнд томилогдсон тусгай хүчнийхний багт Мүн Жэ Ин багтаж байжээ.
Баримт 15. Тэрбээр 1978 онд цэргээс халагдаж, 1980 онд дахин Кюн Хе их сургуулийг дүүргэсэн байна.
Баримт 16. Мүн Жэ Ин 1982 онд тухайн үед өмгөөлөгч байсан Ну Мү Хёньтой хамтран хуулийн компаниа байгуулж байсан гэдэг.
Баримт 17. 2002 оны арванхоёрдугаар сард түүний хамтран зүтгэгч Ну Мү Хён Ерөнхийлөгчийн сонгуульд нэр дэвшиж, Жэ Ин Бусан дахь сонгуулийнх нь штабын даргаар ажиллаж байжээ.
Баримт 18. Ну Мү Хён 2003 онд БНСУ-ын 16 дахь Ерөнхийлөгчөөр сонгогдсны дараа Мүн Жэ Ин Ерөнхийлөгчийн Тамгын газарт орж ажилласан байна.
Баримт 19. 2009 онд Ну гэрийнхээ хойд талын ууланд очиж, амиа егүүтгэн нас барахад ч Мүн Жэ Ин хамтран зүтгэгчээ эцсийн замд нь үдэн, оршуулгын ёслолыг удирдаж байсан нэгэн.
Бармит 20. Мүн Жэ Ин 2011 оны есдүгээр сард “Инноваци ба хамтын ажиллагаа” компанийг үүсгэн байгуулж, төлөөлөгчөөр нь ажиллах болсон байна.
Баримт 21. 2012 оны дөрөвдүгээр сард 19 дахь удаагийн бүх нийтийн сонгуулиар “Ардчилал эв нэгдлийн нам”-ыг үүсгэн байгуулж, нэр дэвшиж байжээ.
Баримт 22. Мүн Жэ Ин 2012 оны арванхоёрдугаар сарын 19-нд Ерөнхийлөгчийн сонгууль болоход Сэнүри намаас нэр дэвшигч Пак Гын Хетэй өрсөлдөн ялагдаж байсан түүхтэй.
Баримт 23. 2016 оны дөрөвдүгээр сард болсон 20 дахь удаагийн бүх нийтийн сонгуульд тэр нэр дэвшээгүй.
Баримт 24. Харин энэ оны дөрөвдүгээр сарын 3-нд намаасаа Ерөнхийлөгчид нэр дэвшихээ зарлаж, БНСУ-ын 19 дахь Ерөнхийлөгч боллоо.
Б.Энхжин
Сэтгэгдэл (4)