Энэ жилээс эхлэн БШУ-ны салбарт тэр дундаа бага, дунд, ахлах ангийн сургалтад маш их өөрчлөлт орж буй талаар Л.Гантөмөр сайд хэлж байна. Нэг үгээр хэлбэл та, бидний сургуульд заалгаж байсан сургалтын арга барил ор үндэсгүй алга болж олон улсын жишигт нийцсэн сургалт, хэрэглэгдэхүүнийг зоригтойгоор туршиж эхэлсэн ба бүр үр дүнг аль хэдийн  үзээд эхэлжээ. Намайг багад зургийн багш маань өөрийнх нь хичээлд муу, муухай зурдаг гэж “60 D” буюу дунд үнэлгээ өгдөг байсан. Одоо бол хүүхэд зургийн хичээлд дургүй бол наамал, чимэглэл гэсэн өөрөө хийж чадах хичээлийг сонгодог болж. Нэг үгээр хэлбэл түүнд сонголт үлдээж байна гэсэн үг. Заавал “Чи зураач болох ёстой” гэж шаардах биш хүүхэд бүрт байх авъяасыг нээж түүгээр нь илүү хөгжүүлдэг болох аж. Энэ мэт таны хүүхдийн сургалтад олон өөрчлөлт орох юм байна. Энэ талаар дэлгэрүүлэн хүргэе.

1.    Өөрчлөлт бага ангийн багш нараас эхэлнэ. Ерөнхийдөө 2014 он бага ангийн багш нарт онцгой анхаарсан жил болох аж. Учир нь бага ангийн багш монгол хүнийг бий болгодог. Тэгэхдээ зөв монгол хүнийг нийгэмд бэлддэг хүн юм. Тиймээс БШЯ-аас 27000 багшийг хүүхэд бүрийг хөгжүүлэх бүрэн сургалтад хамруулсан байна. Одооноос эхлэн бага ангийн багш нар хүүхдийнхээ найз мэт ажиллана. Хүүхэд бүрийг хичээлээ хийхэд нь туслагч байна. Ингэхийн тулд сургалтын арга барилаа өөрчилнө. Өмнө нь багш нар хичээлдээ сайн хүүхдээ хичээлийн дараа үлдээж байгаад олимпиадад бэлддэг байсан бол одоо хичээлдээ тааруу хүүхдээ үлдээж ажилладаг болох аж. Харин хичээлдээ сайн хүүхэддээ илүү даалгавар өгөөд явуулах жишээтэй.
2.    Хүүхдийг үнэлэх үнэлгээ өөрчлөгдөнө. Өмнө нь 100 үгнээс 20 алдсан гэж муу  дүн тавьдаг байсан бол энэ жилээс 80 үгийг нь зөв бичсэн хэмээн сайн үнэлгээ тавьдаг болно. Тэдний урмыг хугалах зүйл хийхгүй гэсэн үг.
3.    Бага ангийн багш нарын цалинг нэмж, тэдний нийгмийн асуудлыг шийдвэрлэхэд нь тусална.
4.    Хүүхдүүдийг зөв дадалд сургана. Ер нь хүүхэд бага ангидаа зөв хүн болж л төлөвшинө. Ингэхийн тулд хичээлээр нь тэдэнд дадал олгох аж. Гараа угаах, том хүнийг хүндлэх, байгаль эх дэлхийгээ хайрлах, найз нөхөд, аав ээж, ахмад буурлууддаа туслах, хог хаяхгүй байх гээд бүх зүйлийг сургалтаар нь олгох аж. Уг хичээлд нь зориулсан ном, сурах бичгүүд ч гарсан байна.
5.    Өмнө нь сургуулийн захирлууд зөвхөн аж ахуйн ажил хийдэг байсан бол одоо хүүхэдтэйгээ ажиллана. Захирлууд өмнө нь сургуулийн дээвэр, сан техник, засвар үйлчилгээ гээд ахуйн чиглэлийн зүйлс ярьдаг байж. Тэдний дунд сурагчдынхаа сурлага, амжилтад санаа тавьдаг энэ тухай хөндөх нэг ч хүн байгаагүй аж. Тиймээс захирлууд ч гэсэн өнгөрсөн хугацаанд хүүхэд бүрийн авъяасыг хөгжүүлэх тал дээр онцгой анхаардаг болсон байна. Учир нь энэ нь багшийн ажлын ахицын үнэлгээнд шууд нөлөөлөх юм.
6.    Л.Гантөмөр сайд сургуулиудын захирлуудад сургуулийн хүүхдүүдийнхээ 80 хувийнх нь нэрийг мэдэж ирэх даалгаварыг өгчээ.
7.    Хүүхдүүдийг удаан цагаар суулгаж болсон, болоогүй янз бүрийн хичээл заах биш тэднийг байгаль, нийгмийн орчинтой нь биечлэн харьцуулсан сургалтуудыг явуулна. Хичээлийн завсарлагаанаар гимнастикийн дасгал хийхээс эхлээд маш олон зүйлүүд энд багтаж байгаа аж.

9.    Тэгэхийн тулд анги бүр, сургуулт бүр, кабинет бүрийг номын сантай болгоно. Өмнө нь хүүхдүүд номын санд очдог байсан энэ жилээс номын сан хүүхдүүд дээр очдог болох аж.
10.    Эцэг, эхчүүдийн оролцоог сайжруулна. Өмнө нь багш нар ангийн засварын мөнгө, фондны мөнгө нэхэж эцэг, эхчүүдээ үргээдэг байсан. Тэгвэл энэ жилээс хүүхдүүдийг нь бүтээл хийлгэж сургаж түүнд нь эцэг, эхчүүдээс хөрөнгө оруулалтыг оруулах аж.
Энэ мэт олон өөрчлөлт таны хүүхдийн хичээл, сургалтад орно. Харин та энэ талаар дэлгэрэнгүй мэдмээр байвал хүүхдийнхээ ангийн багш, сургуулийн захиргаатай илүү ойр ажиллаарай. Та ч мөн хүүхдээ сайн хүн болж төлөвшихөд чухал үүрэг гүйцэтгэх юм шүү. Ер нь хүүхэд бага насандаа өөртай итгэлтэй, бүтээлч, бие даасан, суралцах хүсэл эрмэлзэлтэй, хүний мөс сайтай, өөрийгөө хариуцах чадвартай, уйгагүй оролдлоготой, хийж буй сэтгэлгээсээ ханддаг, үнэнч шудрага, бусадтай хамтран ажиллаж чаддаг, бие сэтгэлээр эрүүл байхад л хангалттай юм байна.