Ховд аймаг дахь Зэвсэгт хүчний 123 дугаар ангид хугацаат цэргийн алба хааж байсан цэрэг биедээ хүнд гэмтэл авч Төрийн тусгай алба хаагчдын эмнэлэгт хэвтэн эмчлүүлж байгаа гэх мэдээлэл цацагдсан билээ. Уг мэдээлэлд тухайн цэргийн эрүү хугарсан, ар гэрийнхэнд нь мэдэгдээгүй, ангийн захирагчийн эхнэр нь хотод авчирч эмнэлэгт хэвтүүлсэн тухай мэдээлсэн байсан юм. Тиймээс уг асуудлаар Зэвсэгт хүчний жанжин штабын Хуурай замын цэргийн командлагч, бригадын генерал Б.Амгаланбаатараас тодрууллаа.

-Ховд аймаг дахь цэргийн ангид алба хааж байсан хугацаат цэргийн алба хаагч бусдад зодуулсан гэх мэдээлэл цацагдлаа. Танд энэ талаарх мэдээлэл ирсэн болов уу?

-Энэ сарын 3-нд болсон асуудал. Маргааш нь буюу энэ сарын 4-нд Бүсийн оношлогооны төвд үзүүлээд Төрийн тусгай алба хаагчийн эмнэлэгт энэ сарын 5-нд ирж хэвтсэн. Одоо эмчилгээ хийлгэж байна. Ховд аймаг дахь цагдаагийн газар хэргийг шалгаж байна.

-Цэргийн анги дээрээ гэмтсэн гэж ойлгож болох уу. Ямар шалтгаанаар гэмтсэн юм бол?

-Цэргийн анги дээрээ гэмтсэн. Хугацаат цэргийн хоёр алба хаагч хоорондоо зодолсон гэдэг мэдээлэл надад ирсэн.

-Удирдлагууд нь зодсон гэх мэдээлэл цацагдсан байсан?

-Тийм зүйл болоогүй. Хоёр цэрэг хоорондоо юм булаацалдсан. Улмаар зодолдсон. Цагдаагийн байгууллага шалгаж байгаа учраас илүү дэлгэрэнгүй мэдээлэл өгөх боломжгүй.

-Нөгөө цэрэг нь гэмтээгүй юм уу?

-Зүгээр, сахилгад сууж байгаа.

-Хэзээ, хаанаас татагдсан цэрэг юм бэ?

-Хоёулаа Ховд аймгийн цэрэг. Өнгөрсөн 2019 оны аравдугаар сард татагдсан.

-Төрийн тусгай алба хаагчийн эмнэлэгт ангийн захирагчийн эхнэр хүргэж ирсэн гэх мэдээлэл гарсан. Энэ үнэн юм уу?

-Хоёулаа нэг онгоцоор ирсэн. Цэргийн алба хаагчийн ээж нь хамт ирсэн. Ар гэрийнхэн нь нэг өдрийн өмнө  ирээд тосож авсан. Ар гэрийнхэнд нь хэлээгүй гэдэг худлаа мэдээлэл. Манай байгууллагаас ар гэрийнхэнтэй нь уулзсан. Дарга нь зодсон гэх мэдээлэл надад ирсэн. Цагдаа шалгаж байгаа.

-Цэргийн хоёр алба хаагч зодолдсоныг гэрчлэх гэрч байгаа юм болов уу?

-Тэрийг сайн мэдэхгүй байна. Анги дотор болсон зүйл юм чинь байгаа байлгүй дээ. Би хэрэг шалгаагүй болохоор мэдэхгүй байна.

Г.Нацаг